Helmet law unang ipatuman sa Negros

CEBU, Philippines - Estriktong ipatuman sa Land Transportation Office (LTO) ang helmet law sa syudad sa Dumaguete, Negros Oriental karong unang semana sa Hulyo agi’g pagpatigbabaw sa kaluwasan sa mga drayber og motorsiklo sa probinsya.

Matud pa ni LTO-7 Regional Director Raul Aguilos higpit nga nagmando sa mga drayber sa motorsiklo sa pagsul-ob sa Standard Protective Helmet.

Gipasabot ni Aguilos nga maoy ilang tuyo nga maproteksyonan ang mga nagmaneho sa maong sakyanan nga duha ang ligid ingon man ang silbing pasahero niini.

Ang mga drayber nga molapas sa balaod sikopon ug pahamtangan og tukmang silot

Nagtambayayong usab ang LTO ug ang Department of Trade and Industry (DTI) sa pag-umol og mga reglamento kalabot sa hustong pagsul-ob sa crash helmet sa pasahero ug sa drayber sa motorsiklo.

Dugang pa usab ni Aguilos nga ang LTO gimandoan sa pagsusi sa matag drayber ug pasahero sa motorsiklo kung nagsul-ob ba kini sa giingong helmet o wala, og kung mapamatud-an nga wala mosunod sa balaod, pareho silang makabayad ug P1,500 alang sa unang paglapas, P3,000 sa ikaduha, ug P5,000 alang sa ikatulong paglapas, samtang P 10,000 ug pagsakmit sa driver’s license niini sa ikalimang paglapas.

Sa nasayran ang DTI-7 nagsugod na sa ilang pagpang-inspeksyon sa tanang suplayer ug mga negosyante og helmet.

Ang standard nga helmet adunay marka nga Product Standard (PS) alang sa lokal nga helmet ug marka nga Import Commodity Clearance (ICC) alang sa mga imported nga helmet.

Sumala pa ni DTI-7 Regional Director Asteria Caberte nga ang iyang opisina nakasuta na nga may mga baligya na nga helmet dinhi sa rehiyon nga minarkahan og ICC busa wala nay katarungan nga dili mosul-ob ang mga drayber ug pasahero sa motorsiklo niini.

Ubos sa balaod nga ang mga tiggama ug ang mga importer og helmet kinahanglan nga mokuha og PS license o ICC mark sa dili pa nila ibaligya ug ipang-apud-apod ang ilang produkto. - Liezl M. Frasno-Correspondent/WC (BANAT NEWS)