CEBU, Philippines - Gipasabot kagahapon ni Kong. Gabriel Luis Luigi Quisumbing sa ika-unom nga distrito sa lalawigan sa Sugbu nga ang iyang pagtipon sa Liberal Party maoy tataw niya nga suporta kang Presidente Benigno Aquino 111.
Ang maong pamahayag iyang gihimo human siya manumpa isip bag-ong miyembro sa LP atubangan ni LP Chairman Mar Roxas niadtong Biyernes nga gisaksihan usab ni Senador Franklin Drilon ang LP vice chairman.
Gani matud pa ni Quisumbing nga una siya manumpa gipaubos siya sa upat ka oras nga basic orientation kalabot sa mga doktrina sa partido.
Apan matud pa niya nga una siya motipon sa LP, nakigtagbo siya kang Governor Gwendolyn Garcia, ang lider sa One Cebu Party diin siya mahisakop kaniadto.
Apan wala na niya ibutyag kun unsay ilang gihisgotan sa maong panagtagbo.
Ang pagbalhin ni Quisumbing ngadto sa LP gihangop sa mga opisyal sa dakbayan sa Mandaue.
Si Vice Mayor Glenn Bercede sa maong dakbayan nagkanayon nga ang maong lakang ni Quisumbing labing makapalig-on sa LP dinhi sa Sugbo ug labaw sa tanan sa pagbaha sa mga proyekto sa dakbayan sa Mandaue. - WC (FREEMAN)