CEBU, Philippines - Duha ang namatay samtang laing duha ang naangol sa pagpamusil nga nahitabo sa managlahing dapit ning dakbayan sa Sugbu kagahapon sa kaadlawon.
Ang nakalas mao sila si Rall Ragasajo, 18, taga Caballes Compound sa barangay Guadalupe, ug Renato Corbeta, 46 taga dalan Cabantan, sa barangay Luz.
Samtang ang mga naangol mao sila si Brendo Ragasajo, 21 ug Winjun Murillo, 18, nga pulos taga Guadalupe.
Si Ragasajo didto patya sa barangay Kalunasan samtang si Corbeta nga usa ka plumber didto usab pusila sa sitio Kamagong, barangay Lahug.
Sumala ni SPO4 Alex Dacua sa homicide section sa Cebu City Police Office sa kapolisan nga ang duha ka Ragasajo ug si Murillo nanayaw sa diskohan sa sitio Dapdap, barangay Kalunasan atol sa piyesta sa maong lugar dihang kalit lang miduol kanila ang suspetsado nga si Frank Simon Ibon, hingkod, ug sa walay igong hinungdan gipamusil ang mga biktima.
Si Rall nasabak sa walang bahin sa dughan, tiyan ug bukobuko nga maoy hinungdan sa hinanaling kamatayon niini.
Samtang sila si Murillo nasabak sa aping kansang bala milapos sa mata ug si Brendo nasabak usab sa tampihak kansang bala milapos sa dunggan. Samtang si Corbeta nakig-inom sa iyang ig-agaw dihang kalit lang mitumaw si Edmor Quirante, nga iyang silingan ug sa walay igong hinungdan gipusil ang naulahi.
Gidala sa tambalanan ang mga biktima, apan nakabsan gyud og kinabuhi si Ragasajo ug Corbeta.
Ang duha ka suspetsado gipangita pa sa kapolisan hangtud karon human kini mangikyas. - WC (BANAT NEWS)