SEA-K program kaabag sa kabus

CEBU, Philippines - Tungod sa tumong nga matabangan ang mga kabus nga makalabang sa kalisud, ang mga benepisyaryo sa Self Employment Assistance Kaunlaran (SEA-K) sa Central Visayas inanay nang nakaumol og ginagmay’ng negosyo.

Sumala pa ni Jimmy Crusio, Project Development Officer 2 sa Department of Social Welfare and Development (DSWD) field office 7 nga sa 80 ka barangay gibana-bana nga aduna nay napulo ka mga barangay nga nakapahimus niining maong programa karong tuiga dinhi sa Sugbo.

Dugang pa niya nga ang pinakagamay nga ipautang sa mga benepisyaryo mokabat sa P1000 ug ang pinakadako mokabat sa P 10,000 kini depende sa ilang itukod nga negosyo.

Kini tungod kay sa dili pa sila makahuwam og kuwarta kinahanglan pa man gayud nga sutaon kung unsa ang matang sa negosyo ang ilang itarok.

Ang matang sa negosyo nga kasagaran nga gigamitan sa kwarta mao ang may labot sa panguma ug pagpatukod og sari-sari store kung diin matud pa ni Crusio nga mohaom gayud ang balor sa kuwarta nga ilang gipautang.

Sa laing bahin si Dionesia Burdas, usa sa mga benepisyaryo nga nahimong presidente sa SEA-K sa barangay Sudlon 2 nga nahinabi sa Banat News mibutyag nga nahimo gayud siyang malampuson tungod kay mainiton man gayud siyang mituman ug mikooperar sa mga gustong ipabuhat sa kadagkuan sa DSWD.

Dugang pa niya nga siya mapasalamaton kaayo tungod kay napili gayud ang ilang barangay nga usa sa natabangan niining SEA-K. (BANAT NEWS)