4Ps giabusohan kay ang kwarta gigamit og puhunan sa sugal ug inom sa uban

CEBU, Philippines - Nanaktak og 1,000 ka mga benepisyaryo sa Pantawid Pamilyang Pilipino Program (4Ps) sa Central Visayas ang Department of Social Welfare and Development tungod sa wala pagsunod sa mga kondisyones sa maong programa.

Sumala pa ni Brigieda Goron, ang Provincial Link Officer sa 4Ps Program sa probinsya sa Sugbo nga ang mga benepisyaryo kinahanglan mohatag og bili sa gihatag nga financial assistance sa gobiyerno.

Ang maong programa maoy usa sa prayoridad sa administrasyong Aquino nga gigahinan og P49.2 bilyones ning tuiga tandi sa tuig 2011 nga P34.5 bilyones lang.

Ang matag benepisyaryo makadawat og P1,400 matag pamilya diin P500 alang sa panginahanglan sa panglawas, educational allowance nga P300 alang sa tulo ka mga batang nangeskwela nga nagpanuigon og 14 paubos ug ang sobra gamiton sa pamuhonan.

Apan matud pa ni Goron daghang benepisyaryong ilang nasakpan nga wala gamita sa maayo ang maong kwarta, dunay uban kanila nga nasakpang giinom ug gisugal ang kwartang gipahuwam sa gobiyerno ug wala makapatungha sa ilang mga anak ug pagtambong sa family development sessions.Lakip sa nadiskubrehan sa DSWD nga dunay mga nakadawat nga dili tinuoray nga kabus. (BANAT NEWS)