SolGen nanginlabot sa demolisyon sa Apas

CEBU, Philippines - Nanginlabot na ang nasudnong kagamhanan sa nag ung-ong nga demolisyon sa kabalayan sa sitio San Miguel, sa barangay Apas ning siyudad sa Sugbo.

Ang Assistant Solicitor General nga si Magtanggol Castro mipadala sa ilang suwat ngadto sa Regional Trial Court aron hangyoon nga dili idayon ang gikatakdang demolisyon karong Mayo 7 ug kinahanglan nga tagaan og 30 ka adlaw nga extension ang mga residente sa pagpreparar sa ilang mga ebidensiya.

Ipahigayon karong buntag ang hearing kalabot niini busa karon pang adlawa masayran kun madayon ba ang demolisyon o dili karong Lunes.

Si Konsehal Alvin Dizon mipadayag nga naninguha gyud ang mga residente sa maong lugar nga makadangop sa nasudnong kagamhanan aron mosamot kalig-on ang ilang puwersa sa pagpalig-on sa ilang baruganan nga dili ma-demolis ang mga panimalay sa 168 ka pamilya sa Apas.

Gisaway ni Dizon si Mayor Michael Rama gumikan kay matud pa nga lahi ang padulngan sa pagtabang niini sa mga maapektohan sa demolisyon tungod kay ang ilang tinguha magpabilin sila sa maong luna.

Samtang si Kongresista Tomas Osmeña misaysay kagahapon nga dako ang iyang pagtuo nga duna gyu’y mga negosyante nga nagpaluyo sa maong kaso nga giingong interesado mopalit sa yuta sa mga Godinez.  

Apan si Rama wala na makugang sa pag-panghilabot karon ni Osmeña apan iya kining gisaway gumikan kay dili unta kini abogado apan kusog kaayo mohatag og dautang komento batok kaniya. (BANATNEWS)