Gipugakhang patay

CEBU, Philippines - Usa ang namatay ug naangol usab ang anak niining lalaki ug laing silingan dihang gipamusil og pugakhang diha sa Purok Tambis, sa barangay Umapad, dakbayan sa Mandaue alas-8 pasado ang takna sa miaging gabii.

Ang namatay mao si Pedro Saladaga, 48, samtang ang grabeng nangaangol ang anak niining si Avelio, 21, ug silingang si Martiniano Rusco, pulos nagpuyo sa maong dapit.

Ang suspetsado mao si Rodante Pelayo, 24, taga Purok Sab-a sa maong barangay sa dakbayan apan lumad nga taga lungsod sa San Remegio.

Si Sr. Insp Stephane Amamag-id, hepe sa Presinto 5 sa Mandaue City Police Office (MCPO) nga nahinabi sa Banat News miingon nga sa wala mahitabo ang maong pagpamusil nagkalalis ang suspetsado ug si Avelio.

Matud pa gipasanginlan sa suspek si Avelio nga maoy mikawat sa iyang kawa apan gihimakak kini ni Avelio hinungdan nga gidapog kini sa suspek. Apan ang namatay pagkakita sa pagdapog sa suspek sa iyang anak daling milaban.

Si Pelayo daling midagan apan mibalik nga armado na og pugakhang dayon gipusil ang mga biktima.

Si Pedro naigo sa dughan, samtang sa walang paa naigo ni Avelio samtang naangil usab si Rusco nga diha atol sa pagkahitabo nga naigo sa bukobuko.

Ang tulo gidala sa Mandaue City Hospital apan gideklarar nga patay na si Pedro.

Ang suspek daling miikyas apan mitahan kini ngadto sa paryenteng polis nga si PO3 Teofilo Calongin nga nagpuyo sa barangay Talamban, dakbayan sa Sugbo kinsa mao na kini ang nagtugyan ngadto kanila sa Presinto 5. (/EIM)  (BANATNEWS)