Sa kasaysayan karon

CEBU, Philippines - 1904— Natawo ang sikat nga musikerong si Antonino Buenaventura sa lungsod sa Baliuag, Bulacan. Siya naproklamar nga National Artist for music niadtong 1988.

1886 – Ang labing unang phonograph o naila kaniadto nga gramophone nga mogamit og plaka aron mopatukar og musika na-patented. Kini maoy nahimong modelo o gikopyahan sa misikat usab nga amplifiers aron makapaminaw og musika. Sa susamang adlaw usab kini gi-patent o gipalisensyahan aron di makopya sa uban.

1932 – Nabilanggo ang labing sikat ug notoryos nga kriminal nga gibansagan sa Estados Unidos nga Public Enemy Number One nga si Al Capone diha sa prisohan sa Atlanta Penitentiary, dili sa kasong pagpanulis og bangko o pagpatay kondili sa wala niya pagbayad og buhis.

1930 – Gidakop sa labing unang higayon ang pangulo sa civil disobedience sa India nga si Mahatma Gandhi, siya gikostudiya sa mga mananakop nga Briton nga maoy mikoloniya sa India.

2009 – Sa talagsaong hitabo, usa ka North Korean cargo ship ang giluwas gikan sa pagsuway og hi-jack sa mga piratang Somali sa Indian Ocean sa mga sakop sa South Korean Navy nga nagbantay sa maong kadagatan. Ang mga South Korean nga nakadungog sa pagpangayo og tawag sa North Koreans maoy misalbar kanila gikan sa mga pirata. Ang North Korea ug South Korea pabiling anaa sa estado sa giyera sulod na sa kapin 50 ka tuig. (BANATNEWS)