CEBU, Philippines - Samaran ang usa ka Indian national human kini gipusil sa wala mailhing tawo sa sitio Kalubihan sa barangay Pajac dakbayan sa Lapulapu sa milabay’ng gabii.
Ang biktima mao si Jaswinder Gil Singh, 39, residente sa sitio Abuno sa barangay Pajac sa maong dakbayan ug tigpautang og salapi.
Si SPO1 Allan Pantaleon nagkanayon dili tulis ang motibo sa krimen sanglit wala man kuhaa ang iyang kwarta ug mga alahas sa mamumuno.
Nagduda silang posibleng may kalambigitan sa pagpautang niini og kwarta ang motibo sa krimen kay tingali adunay nasuko nga gipaninglan sa utang ug mipusil sa biktima aron makabawos. Sa pasiunang imbestigasyon sa kapolisan si Singh mitug-an nga samtang siya nagmotorsiklo gikan naningil usa ka tawo ang kalit mibabag sa iyang atubangan ug dayong pamusil.
Si Singh nakaangkon og duha ka samad pinusilan sa tiyan ug gidali kini og dala sa tambalanan. Samtang ang lalaking namusil daling nakasibat. (BANATNEWS)