I-Rice girekomendar sa NFA sa publiko

CEBU, Philippines - Gihingusgan sa National Food Authority (NFA) ang promosyon sa iron fortified rice (I-Rice) aron mapugngan ang Iron Deficiency Anemia (IDA) sa mga batang nagpangidaron og unom ka bulan o wala pa kaabot og usa ka tuig ug usab alang sa tanang inahan nga nagsabak ug nagpasuso pa dinhi sa nasud.

Matud pa ni NFA-7 information officer Lucy Rosales nga ang dakong adbokasiya ug kampanya sa ahensya mao ang pagpahibalo sa publiko kabahin sa mga kaayuhan nga makuha sa paggamit og I-Rice.

Dugang pa niya nga ang NFA milusad sa I-Rice niadtong 2011 pinaagi sa pagsunod sa dugang panginahanglan sa micronutrient (bitamina ug mineral) nga makuha gikan sa harina, mantika, refined sugar ug gatas.

Sa laing bahin ang kagamhanan sa ahensya sa pagkaon ug NFA kanunay’ng mopasiugda og panagtigom ug mosalmot sa nagkadaiyang food expo aron mapahibawo ang katawhan mahitungod sa I-Rice ug mga maayong benepisyo sa panglawas.

Si Rosales usab miingon nga ang I-Rice sa NFA puno gyud sa iron kung diin makatabang kini sa pagbatok sa problema sa anemia sa nasud ilabi na sa mga kabataan. Kini mapalit sa tanang NFA rice retailers sa nasud. (BANATNEWS)