4 marijuana planters kasohan

CEBU, Philippines - Gatosan ka punoan sa marijuana ang gipanglarot sa kapulisan sa lungsod sa Balamban kagahapon sa buntag sa barangay Magsaysay sa nahisgutang lungsod.

Si PO1 Rodney Cambarijan sa Balamban Police Station nga nahinabi sa Banat News nagkanayon nga upat ka mga cultivator ang nakaikyas apan ilaha silang nailhan nga sila si Cerilo Bacon, Rolando Bacon, Antonio Lubas ug Francisco Bacon pulos mga residente sa sitio Sandayong sa nahisgutang barangay.

Gisugdan ang operasyon sa kapulisan pinangulohan ni Supt. Anthony Bagarinao alas-8 sa buntag   ug ilang naibot ang 558 ka fully grown nga marijuana ug gibanabanang usa ka kilo nga seedlings. Matud ni Cambarijan ang upat namahuway sa gamay nga payag duol sa plantasyon dihang nakakita kini sa kapulisan nga nagtungas hinungdan nga daling nanawagan ug wala na gyud madakpi sa kapulisan.

“Tungason man gud ang area ug nakakita sila sa mga pulis mao to gigukod pero wala na gyud nadakpan,” asoy pang Cambarijan.

Bisan tuod og nakaikyas ang upat ka mga suspek, ila gihapon kining pasakaan og tukmang kaso ngadto sa piskaliya.

Ang mga punoan sa marijuana kasamtangan unang gipahiluna sa stockade sa Balamban Police station ug gikatakdang dad-on unya diha sa provincial headquarters sa Cebu Provincial Police Office (CPPO) alang na sa pagsunog niini. - BANAT NEWS