TCPS nagmantinir sa 2 patrolcar

CEBU, Philippines - Kapolisan sa dakbayan sa Talisay nagkinahanglan og dugang sakyanan alang sa ilang operasyon matag adlaw tungod kay sulod sa pipila na ka bulan duha lang gihapon ka sakyanan ang ilang gigamit.

Ang Talisay City Police Station adunay duha ka sakyanan nga nagdagan nga mao ang Innova patrol car ug ang Hilux back to back patrol car.

Apan si Supt. Eddie Recamara, hepe sa TCPS nagkanayon nga bisan og kuwang sila sa mga sakyanan gipaningkamutan nilang makahatag og saktong serbisyo ngadto sa katawhan.

Matud ni Recamara nga ang duha nila ka Terrano patrol cars dili na mapuslan pa hinungdan nga giuli niya kini sa siyudad.

Ang problema sa kakulang sa transportasyon mabatyagan sa TCPS kun usa sa duha nila ka nahibiling sakyanan ang maguba.

Kun kini mahitabo kanunay nalang nga ang personal nga motorsiklo sa mga polis maoy gamiton sa pagresponde sa alarma.

Sumala pang Recamara lapad ang hurisdiksyon sa Talisay maong ang duha ka sakyanan dili makasustiner sa pagpatrolya 24-oras.

Una nang mipadala og suwat si Recamara sa siyudad sa Talisay nga nag-request og dugang patrol car apan hangtud karon wala pa kini masolusyoni. - BANAT NEWS