P1milyon nawagtang sa pagpanglungkab

CEBU, Philippines - Mikabat sa kapin P1 milyon ang kantidad sa kabtangang gisakiyo sa wala hiilhing kawatan nga milungkab sa balay sa usa ka Koreano didto sa MS No. 10 Calle Viola, BC Homes subdivision, Salinas Drive Extension, sa barangay Lahug ning dakbayan sa Sugbo niadtong Lunes sa gabii.

Ang biktima mao si Seong Meong Seog, 45, ulitawo nga taga habagatang Korea apan kasamtangang nagpuyo sa Lahug.

Ang mga butang nawagtang naglakip sa nagkalainlaing klase sa camera nga may mga brand sama sa Cannon , Nikkon, Olympus ug Sonny, mga relo de pulso nga may mga brand nga Rolex ug Oris, Ipad ug laptop mac book computer nga ang tanan nagkantidad og kapin sa P1 milyon.

Si Shahan May Jenson, 24, dalaga kinsa nagpuyo sa balay sa biktima maoy misumbong sa kapolisan kalabot sa maong pagpanglungkab 

Matud pa ni PO2 Reynaldo Labating sa Cebu City Police Office nga ang kawatan nakasulod sa balay sa biktima pinaagi sa pagguba sa kandado sa main door sa balay.

Padayon pang gipangita sa kapolisan ang mga kawatan. - BANAT NEWS