CEBU, Philippines - Mikabat sa 43 ka mga construction worker nga taga Pinamungajan na-rescue sa mga otoridad gikan sa usa ka illegal recruiter nga Taiwanese kinsa mitanyag kanila og trabaho sa Palawan.
Si Mayor Geraldine Yapha sa lungsod sa Pinamungajan atol sa interview sa Bantay Radyo mibutyag nga ang maong mga trabahante anaa na karon sa isla sa Coleon, Palawan human sila rescueha sa kapolisan sa maong lungsod ug gitakda nga mahiuli sila sa Pinamungajan niining semanaha.
Matud pa ni Yapha nga ang mga asawa sa maong mga construction worker nga taga barangay Rizal, sa maong lungsod midangop kaniya niadtong Sabado.
Kini human matanggong ang ilang mga bana didto sa isla sa Coleon tungod kay wala tumana sa Taiwanese national (kansang ngalan wala ibutyag) ang ilang sabot bahin sa suholan ug pagkaon, hinungdan nga gusto na kining mamauli.
Midugang si Yapha ang mga konstituwenti niyang nagtrabaho sa konstruksyon gi-recruit sa Taiwanese national kay maoy patrabahoon sa beach resort niini didto sa isla sa Coleon, Palawan ug gipalarga ang maong mga trabahante sakay sa usa ka eroplano niadtong Miyerkules sa milabay’ng semana.
Apan niadtong Biyernes nangreklamo ang maong mga trabahante ug nanawag sa ilang mga asawa kay nagpatabang nga makapauli sila tungod kay wala motuman ang Taiwanese sa gikasabotang suhol ug sa ilang pagkaon.
Tungod niini si Mayor Yapha nakig- alayon kang Interior Secretary Jessie Robredo pinaagi sa pagtawag sa cell phone niini niadtong Domingo sa buntag ug nangayo og tabang pagsulbad sa maong suliran.
Hinungdan nga gimandoan dayon ni Robredo ang kapolisan sa pag-rescue sa maong mga construction worker nga napundo didto sa isla sa Coleon.
Kagahapon ang 43 ka mga trabahante nadala na ngadto sa munisipyo sa Coleon ug nakigsabot na sila sa kapolisan ug provincial administrator sa Palawan aron ikatakda ang ilang pagpauli sa Pinamungajan niining semanaha. - BANAT NEWS