Banhig 1 patay 1 angol

CEBU, Philippines - Namatay diha-diha ang usa ka lalaki, samtang samaran ang kalive-in niini human sila banhigi sa duha ka wala hiilhing kriminal didto sa Barangay Pajo, dakbayan sa Lapulapu sa milabay’ng gabii.

Ang biktima mao si Junrey Mejias Cabente, 29, ulitawo, usa ka drayber sa traysikol, samtang angol usab ang kapuyo niini nga si Yvonne Miral, hingkod nga pulos nagpuyo sa Sitio Bato, barangay Ermita dakbayan sa Sugbo. Sa pasiunang imbestigasyon nila ni PO2 Luisito Ernie ug PO2 Franklin Bulaquia, sa Lapulapu City Police Station nasuta nga sa alas 11:00 sa milabay’ng gabii, gikang namisita si Cabente ug Miral sa ilang higala sa Poblacion, Lapulapu.

Samtang nagpadagan sila sa ilang   motorsiklo pauli sa Ermita, duha ka tawo nga luwan sa laing motorsiklo kalit mibabag sa karsada ug dayong pamusil kanila.

 Si Miral nalagpot sa karsada apan samdan ang iyang mga kamot ug paa, samtang si Cabente nga nasabak sa ubay-ubay nga mga bala nakadangat pa sa Lapulapu City Hospital diin didto kini ideklarar nga patay na sa paghiabot didto.

Ang kapolisan nakapunit og pito ka mga bala sa kalibre 45 nga pistola nga posibleng maoy gigamit sa pagpamusil.

Nasuta nila nga gumikan sa kangitngit ug kaawaaw sa maong lugar wala gayuy nakaila sa mga kriminal.

Matud pa ni P/Insp. Zenaido Pastorfide sa Homicide section sa kapolisan sa Lapulapu nga ang mga anggulo nga ilang gisusi sa maong krimen mao ang bahin sa illegal nga drugas o love triangle.

Kini tungod kay   si Miral giingong mikuyog kang Cabente didto sa Lapulapu tungod sa pagduda niini nga may karelasyong laing babaye ang iyang kapuyo.

Padayon pang gipangita sa kapolisan ang mga kriminal.   - BANAT NEWS