K+12 suportado sa negosyante

CEBU, Philippines - Suportado sa mga negosyante ang gilusad sa kagamhanan nga K+12 education program. 

Kini maoy gipadayag ni Philip Tan usa ka magpapatigayon ug representante sa management nga naglangkob sa Regional Tripartite Wages and Productivity Board (RTWPB)7 kinsa nagkanayon nga usa kini sa paagi aron mosakar ang edukasyon sa mga estudyante sa mga trabaho nga angayan nilang sudlan sa panahon nga mograduwar sila.

Matud pa ni Tan nga mao usab kini ang gitinguha sa mga negosyante aron nga kun hanas ug batid na ang mga bag-ong mograduwar , taas usab ang ilang productivity nga maghatag og pabor sa ilang mga katrabahoan.

Gisulti kini ni Tan tungod kay isip usa ka amo, siya ang labing nasayud nga kasagaran sa mga estudyante nga igo lang migraduwar og elementarya ug high school karong panahona kuwang kaayo sa hiantigohan sa trabaho nilang sudlan kay bisan sa pagbasa ug sa pagsabot sa iyang gibasa maglisud pa.

Maoy hinungdan nga nagpasalamat silang mga negosyante dihang nasayran nila nga pinaagi sa Department of Education (DepEd) ug sa Commission on Higher Education (CHED) gilusad niini ang K-12 education program.

Ang K+12 usa ka programa nga kinopya sa kagamhanan gikan sa mga nasud sa gawas nga nagpatuman niini.

Dinhi sa K+12 sayo nga patunghaon ang usa ka bata sa kindergarten una siya mo-grade 1, unya himoong pito ka tuig ang elementarya ug pun-an og duha ka tuig ang high school una makatungha og kolehiyo ang usa ka estudyante , siyarong utoka og dili mabaid, matud pa ni Tan.

Dugang pa ni Tan nga importante gayud ang mental skills kay sa hand skills tungod kay dinhi makita ang ka brilyante sa tawo sa pag-atubang sa tanang matang sa trabaho. Matud pa ni Tan nga ning panahon nga midaghan na ang populasyon sa nasud makatarunganon lang sa kagamhanan nga moumol og mga modernong paagi sa edukasyon ug biyaan na ang kinaraan.

Matud pa niya nga ang K+12 nasuwayan na nga epektibo sa mga nasud nga nagpatuman niini ug walay katarungan nga dili usab kini mosaler dinhi sa Pilipinas, dugang pa niya. (/WC)(BANAT NEWS)