Davide OK ra mag-bise ni Magpale

CEBU, Philippines - Ang provincial chairman sa Liberal Party sa Cebu Province nga si Hilario “Junjun” Davide III mipadayag nga andam kining mokandidato pagka Bise Gobernador pares kang bise gobernador Agnes Magpale isip kandidato sa pagkagobernador sa Sugbu kung makaayo kini sa tanan.

Kagahapon sa 888 Forum nga gipahigayon diha sa Marco Polo Plaza Hotel sa barangay Lahug sa dakbayan sa Sugbo, si Davide nagkanayon nga dunay nangutana kaniya kabahin sa posibilidad sa maong kasabutan. “Sa public service you must also prepare to make difficult decisions, our choices then mosakripisyo alang sa kaayohan,” matud pa niini.

Matud niya nga dili siya mosupak kun awhagon siya ni Presidente Benigno Aquino III nga mag-bise gobernador kang Magpale kung kini alang sa kaayohan sa mga Sugboanon.

Kahinumduman nga si Magpale ubos sa Bakod Party nga kaalyado sa One Cebu Party ni Gobernador Gwendolyn Garcia kansang igsuon nga si Pablo John Garcia maoy ituboy nila sa pagka-gobernador.

Apan si Davide miklarong di makalaom og suporta gikan kaniya si Gobernador Garcia kun modagan kini pagka-senador tungod kay dunay kaugalingong lineup ang LP. (BANAT NEWS)