Hagbong ang grado ni P.Noy sa mamumuo
CEBU, Philippines - Naghiusa ang tanang caused oriented groups ug ubang civic organizations paglusad og lihok protesta atol sa kasaulogan sa Labor Day kagahapong adlawa ug gipahingusgan ang usbaw sa suhulan nga P125 ug pabasura sa Contractualization Law.
Ang buhatan sa Department of Labor and Employment (DOLE)-7 giralihan sa dili mominus unom ka grupo sama sa Associated Progressive Labor, Associated Labor Union (ALU-TUCP), Philippine Airlines Employees Association (PALEA) Kilusang Mayo Uno (KMU).
Si Nick Labrado member sa board sa PALEA nga nahinabi sa Banat News nagkanayon pakigbatokan ang mga polisiya sa contractualization nga giabuso na sa mga kompaniya.
Giawhag ni Labrado ang mga kongresista nga mopasar og balaudnon bahin sa security of tenure sa mamumuo.
Si Konsehal Alvin Dizon nga nahinabi sa Banat News kinsa miduyog sa protesta miingon nga daghang mga negosyante sa dakbayan ang wala mohatag og saktong minimum nga suholan ug wala mohatag og 13th month pay nga gimando sa Wage Law.
Diha sa Fuente Osmeña hangtud sa Colon Area laing mga grupo nga milusad usab og lihok protesta nga naglakip sa Bayan,Bayan Muna, Anak Pawis, Associated of Concerned Teachers (ACT) ug uban pa ang miduyog sa lihok protesta.
Si Jaime Paglinawan, chairman sa Bayan Central Visayas mihulagway kang Presidente Benigno Aquino III nga hagbong ang grado kanila tungod kay wala mahatag ang gipanaad niini kanila.
Bisan sa kadaghan sa nagprotesta, gihulagway ni Sr.Supt. Melvin Ramon Buenafe ang direktor sa Cebu City Police Office nga hapsay ug malinawon ang kasaulogan sa Labor Day. Si Buenafe miangkong mas daghan ang miduyog sa lihok protesta kagahapon itandi sa miaging tuig. (BANAT NEWS)
- Latest
- Trending
