Balay gisunog, mga baboy gipamusil

CEBU, Philippines - Usa ka lakaki ang miunay og sunog sa balay sa iyang apohan kagahapon sa hapon diha sa sitio Buyong, barangay Maribago, dakbayan sa Lapu-Lapu.

Nagtingkagol diha sa station 2 sa Lapu-Lapu City Police Office si Junrey Igot Cacha, 31, residente sa nahisgutang dapit.

Si PO1 Estevenson Zozobrado kinsa usa sa miresponde sa hitabo mibutyag sa Banat News nga si Cacha miunay og sunog sa balay sa iyang apohan nga si Ramon Igot, 57-anyos.

Hinuon walay gikatahong naangol sa maong sunog tungod kay wala nay nagpuyo sa balay ni Ramon gawas sa duha ka mga baboy nga naigo sa bala diha sa buko-buko ug dunggan ug iya sa ig-agaw sa suspetsado.

Matud ni Zozobrado nga giangkon ni Cacha ang pagsunog niya sa balay sa iyang apohan tungod kay duna siya’y personal nga problema apan giingong dili niya intensiyon ang pagpusil sa mga baboy kay naigo lang kini dihang nagpabuto siya.

Gibutyag ni Zozobrado nga si Cacha dunay bench warrant sa kasong illegal possession of firearms niadtong tuig 2010 diha sa sala ni Regional Trial Court (RTC) Judge Victor Teves sa Branch 54 sa dakbayan sa Lapu-Lapu.

Na-recover sa mga polis gikan sa iyang posesyon ang usa ka kalibre .38 nga revolver nga dunay unom ka buhing bala ug lima ka kabhang sa maong kalibre sa armas.

Human og sunog sa balay sa iyang apohan misulod si Cacha sa iyang balay ug malinawong mitahan dihang gitawag sa mga polis. (/EIM)(BANAT NEWS)