STC mikiha'g child abuse batok ginikanan
CEBU, Philippines - Gitinuod sa tagdumala sa Saint Theresa’s College (STC) ang pagpasaka og sumbalik nga kaso nga child abuse batok sa mga ginikanan nga unang mipasaka og kaso batok sa maong eskuylahan.
Gisandig sa STC ang ilang kiha gumikan sa paglapas sa mga hingtungdang ginikanan sa Article VI, Section 10 of RA 7610 nga may labot sa Article 59 of PD 603” nga nagbatbat sa kamahinungdanon sa papel sa mga ginikanan sa paggiya sa hustong kinaiya ug pamatasan sa ilang mga anak.
Ang mga kihanti mao ang Directress sa STC nga si Sr. Purisima Pe, ICM ug ang Assistant Principal nga si Mussollini Yap.
Si manlalaban Joan Largo, abogado sa mga kihante mibutyag sa Banat News kagahapon sa hapon nga pormal na nilang gisang-at ngadto sa korte ang kasong child abuse batok sa mga ginikanan sa mga menor de edad nga mga estudyante sa STC. Matud pa ni Largo ang ilang gibasihan sa pagsang-at sa maong kaso batok sa mga ginikanan mao ang kapakyas sa mga ginikanan paghatag og maayong giya sa ilang mga anak hinungdan nga nahipunta kini sa maot nga dalan base sa PD 603.
“ Under RA 7610, in relation to Art. 59 of PD 603, parents who cause or encourage their children to lead immoral or dissolute lives are criminally liable for child abuse” tipik sa pamahayag sa STC.
Matud pa ni Largo nga ang ginikanan dako kaayo og responsibilidad sa pagbantay sa ilang mga anak aron dili kini matumpawak sa kadaot ilabi na sa mga law-ay nga buhat sama sa pag-inom og alak, panigarilyo ug uban pa.
Hinuon matud pa sa STC nga andam silang mopasaylo kun gikinahanglan.
Samtang ang abogado sa kampo sa mga ginikanan nga si manlalaban Cornelio Mercado wala kaayo mopatin-aw sa iyang tubag kalabot niining maong kaso nga atubangon sa iyang mga kliyente. (BANATNEWS)
- Latest
- Trending
