2 ka buwang puya patay human madasmagi og sakyanan ang inahan

CEBU, Philippines - Patay ang kapin duha pa ka buwan nga batang lalaki ug talandugon ang inahan niini dihang silang duha nangalabay human madasmagi og sakyanan nga gimaneho sa usa ka kapitan sa barangay samtang naglakaw daplin sa karsada sa sitio Tomas sa barangay Kawit, lungsod sa Medillen niadtong Domingo sa alas 5:00 sa hapon.

Ang biktima mao si Daria Tumabine Tomakay, 37, nagpuyo sa maong lugar ug ang namatay pag-abot sa tambalanan mao ang iyang gikugos nga duha pa ka bulan kapin nga anak nga si John Nino Tomakay.

Ang nakadasmag niya mao ang Hi-Ace van Toyota Grandia kolor gray nga gimaneho ni Kapitan Rene Olivar sa barangay Lamintak Norte sa Medillen.

Matud ni SPO4 Carlos Condino, desk officer sa Medillen Police Station nga nahinabi sa Banat News nalamba ang inahan nga nagkugos sa anak diha sa karsada ug nabuhian ang bata nga mitugpa sa dalan.

Ang duha gidala og lahos sa Chung Hua Hospital sa dakbayan sa Sugbo tungod kay anaa sa talandugon nga kahimtang apan kagahapon sa buntag ang iyaan sa naangol nga inahan sa bata mibisita sa sibyaanan sa DyDD aron manawagan sa mga kabanay ngadto sa norte.

Matud pa sa iyaan nga si Beth Tomakay nga gikahinabi sa Banat News namatay gyud ang bata alas-10 sa gabii niadtong Domingo tungod sa grabeng nahiagumang kadaot sa ulo niini.

Ang kapitan boluntaryong mitahan ngadto sa kapolisan samtang ang inahan sa bata anaa pa gihapon sa Intensive Care Unit (ICU) tungod kay gihulagway nga talandugon pa ang kahimtang niini.     - BANAT NEWS