P6.8M nga ekipo gipangayo sa bombero

CEBU, Philippines - Ang Cebu City Fire Department nga gipangulohan ni Senior Superintendent   Aderson Comar mi-request karon kang Mayor Michael Rama og mga ekipo alang sa iyang departamento nga mobalor ngadto sa P6.8 million. Base sa suwat nga iyang gipadala, nanginahanglan si Comar og telescopic ram, battery powered rescuevibrascope, circular saw ug uban pa.

Ang chief of staff sa mayor nga si Philipi Zafra nagkanayon nga ipaubos sa pagtuon ang gipangayong ekipo ni Comar ug aminado siya nga nanginahanglan gyud niini ang kabomberuhan aron mapalapdan pa ang ilang serbisyo.

Una nang gipadayag kaniadto sa mayor nga susihon niya ang panginahanglan sa fire department apan unahon usab niya pagdangop ang nasudnong buhatan sa Bureau of Fire Protection ug Department of Interior and Local Government nga maoy partikular nga naghupot sa nahisgutang departamento.

Usa usab sa problema karon sa fire department mao ang kakuwang sa ilang fire trucks. Sa nangagi nga interbyu ni Comar misaysay kini nga 17 lang karon ka fire trucks ang nag-operate sa siyudad sa Sugbo apan kuwang gihapon kini.

Giingong nakatabang pag-ayo ang mga fire substations sa Labangon, Pahina Central, Pari-an, Pardo, Guadalupe, Lahug, Mabolo, Talamban ug San Nicolas.

Giklaro hinuon ni Comar nga bisan sa kagamay sa ilang mga kahimanan, ilaha gihapon nga gipaningkamotan ang kalidad sa serbisyo panahon sa emerhensya.   - BANAT NEWS