Talisay fish port giilogan sa 2 ka brgy.

CEBU, Philippines - vang suliran sa mga kapitan sa barangay San Roque ug Tanke kun hain mahisakop nga barangay ang Talisay Fish Port wala pa masulbad tungod kay pulos sila nagkupot og ebidensya nga mopamatuod nga matag usa kanila may katungod sa pagpangangkon sa maong proyekto.

Gumikan niini wala makaandar ang kasamtangang Talisay fish port sukad kini subhi niadtong tuig 2009 tungod kay wala masuta kun hain kining barangaya mahisakop, sa San Roque o sa Tanke ba.

Kusganon nga gipalanog ni Konsehal Romeo Villarante sa kampo sa oposisyon kinsa misugyot nga una tutokan ang operasyon sa maong fish port kinahanglang unahon pagsulbad ang bangi sa duha ka barangay aron masuta kung asa nga barangay nasakop ang maong fish port.

Kini tungod kay ang kitaon sa maong fish port may bahin niini ang barangay nga nagsakop niini.

Si Kapitan Antonio Cabrera Jr.sa barangay San Roque nangangkon nga nahisakop pa sa ilang teritoryo ang fish port samtang si Kapitan Perla Cabanes nga nahinabi sa Banat News nagkanayon nga sakop usab sa barangay Tanke ang maong fish port.

Ang duha ka opisyal sa duha ka barangay pulos misumiter og mga dokumento ngadto sa konseho pagmatuod nga sila maoy nanag-iya sa lote nga gitarokan sa fish port nga giingong giangkon sa San Roque.

Matud ni Cabanes nga naglaom sila nga ang desisyon sa konseho mopabor kanila tungod sa mga ebidensiya nga ilang nasumiter.

Sayo niini si Cabanes maoy miawhag sa konseho sa siyudad nga hatagan og pagtagad ang ilang problema aron masulbad na kini.

Ang konseho migama na og grupo nga gitahasan sa pagsusi niining maong isyu aron masuta ang mga utlanan sa nahisgutang duha ka barangay.

Ang maong fish port natukod habig sa Cebu South Coastal Road.

Si Cabrera sa iyang bahin, nagkanayon nga lig-on kaayo ang ilang ebidensiya nga gisubmiter ngadto sa konseho sa pagmatuod sa ilang pangangkon sa fish port.

Gipasabot ni Cabrera nga ang tax declaration sa lote diin matukod ang fish port nasakop sa ilang barangay.

Matud sa kapitan nga adunay mga lote ilabi na ang gitukoran sa usa ka restaurant kilid sa fish port giingong sa barangay Tanke apan ang tax declaration nasakop sa San Roque.

Si Cabrera nagkanayon usab nga makita sa Municipal Boundary Monument (MBM) nga ang maong fish port sakop sa ilang barangay ug naglaom usab siya nga mopabor kanila ang desisyon sa konseho.

Apan bisan pa sa pag-ilog sa utlanan sa duha ka mga barangay si Cabanes ug Cabrera nagkanayon nga wala magkasiloay ang ilang mga kabubut-on ug maayo ang ilang mga pagtinagdanay sa usa’g-usa lakip sa ubang mga opisyal sa ilang mga barangay. – (BANAT NEWS)