CEBU, Philippines - Nagtingkagol sa Talisay City detention cell ang usa ka suspetsadong kawatan human kini maabti sa mga polis diha sulod sa Cebuana Lhuillier Pawnshop sa barangay Tabunok, dakbayan sa Talisay niadtong Sabado sa gabii.
Apan ang kauban niini daling nakaikyas ug ang gwardiya sa maong pawnshop ang naangol human mahagbong gikan sa kisame sa pawnshop dihang iyahang gisusi diha sa ilawom sa kisame kung wala ba magtago didto ang laing kawatan. Ang nasikop mao si Rodel Econas samtang gipangita pa si Junbert Tabasa nga nakaipsot, ang duha nga parehong 18-anyos pulos residente sa sitio Iba, barangay Lagtang, Talisay.
Ang gwardiya nga naangol ug daling gidala ngadto sa Talisay City District Hospital mao si Junlee Cabañero.
Base sa blotter sa kapolisan, si Manny Marites sa Security System Monitoring Incorporated daling mi-report sa Talisay City Police Station kabahin sa pagtingog sa system device sa nahisgutang pawnshop. Ang kapolisan daling miresponde sa maong report ug naabtan nila diha sa sulod sa pawnshop si Econas, samtang si Tabasa nakaikyas.
Ang gwardiyang si Cabañero misuway og subay diha sa kisame pamasin nga diha lang magtago si Tabasa apan aksidenteng nahagbong ang gwardiya sa iyang pagsaka.
Ang mga suspetsadong kawatan milungkab kini sa kesame sa pawnshop hinungdan nga nakasulod. Ang kapolisan nakadawat og report nga si Econas naila kini sa ilang dapit nga manglung kabay ug gani nasikop na kini kaniadto sa mga polis, gani napasakaan na kini og susamang kaso ni SPO4 Daniel Tarucan apan gipabuhian tungod kay menor pa kini kaniadto. – (BANAT NEWS)