Mimo Osmeña angay mag-governor

CEBU, Philippines - Mas maayong modagan si Mariano “Mimo” Osmeña, anak ni kanhi gobernador Emilio “Lito” Osmeña, sa pagka-gobernador sa lalawigan sa Sugbo kaysa mag-mayor sa dakbayan sa Talisay.

Kini ang tambag ni kanhi senador Sonny Osmeña ngadto sa iyang igsoon nga si Lito.

Matud pa ni Sonny nga lig-on kaayo si Kong. Eduardo Gullas sa unang distrito sa lalawigan sa Sugbo nga pakig-atbangan ni Mimo.

Si Gullas gikataho nga modagan sa pagka-mayor sa dakbayan sa Talisay samtang ang anak o apo niini maoy mokandidato sa pagka-kongresista.

Dili usab uyon si Sonny nga modagan pagka-kongresista si Mimo sanglit anaa man si San Fernando Mayor Antonio Canoy nga modagan pagka-kongresista ubos sa Liberal Party. 

Matud pa ni Sonny nga nagdumili pa si Lito pagsanong sa iyang awhag apan pabilin siyang nanghinaut nga mausab ra ang hunahuna sa iyang igsoon sa umaabot nga mga adlaw.

Buot si Sonny nga si Mimo ang modagan pagka-gobernador ubos sa LP gumikan sa iyang pagtuo nga dili modaug si Hilario Davide III.

Kung madayun pagdagan si Mimo pagka-gobernador, hayan tulo ang mag-atbang sa maong posisyon lakip sila si Davide ug Kong. Pablo John Garcia sa One Cebu Party. – (BANAT NEWS)