CEBU, Philippines - Nagtibi nga misumbong sa kapolisan ang usa ka drayber sa taxi human masakiyo sa bayot niyang pasahero apan tulisan ang iyang P1,000 kapin nga kuwarta didto sa dalan A.C. Cortes Avenue sa barangay Alang-Alang, dakbayan sa Mandaue sa miaging kaadlawon.
Ang biktima mao si Pepiano Babatoan, 66, minyo nga taga barangay Marigondon, sa dakbayan sa Lapulapu ug drayber sa RC Taxi nga nagdala sa plate number GBX 491.
Si PO3 Nersas Baay sa kapolisan sa Presinto 1 sa Mandaue City Police Office (MCP0), miingon nga mipara sa taxi sa biktima ang wala hiilhing bayot didto sa dalan S.B. Cabahug atbang sa Ibabao Coliseum ug mimando kining magpahatod sa usa ka hotel sa dakbayan sa Lapulapu.
Dugang pa niya nga samtang nagpadagan ang biktima sa iyang taxi , kalit lang kining gimandaran sa iyang pasahero sa pagpahunong atubangan sa usa ka dakong tindahan sa barangay Alang-Alang.
Matud pa ni PO3 Baay nga dihang mihunong na ang taxi, gitionan dayon sa tulisang bayot sa iyang armas de fuego ang ulo sa biktima uban sa pagpahibawo nga tulis ug gipangayo ang iyang kuwarta.
Matud pa ni PO3 Baay nga gumikan sa hilabihang kalisang sa biktima gitunol niini nga nagkusmod ang iyang pitaka nga may kaping P1,000 nga sulod. Ang bayot nga tulisan abtik kaayong nanaog sa taxi human makuha ang pitaka sa biktima uban sa hulga nga kun dili mopadagan sa iyang sakyanan buk-an niya sa bagulbagol ang biktima.
Busa misirit sa pagpadagan ang biktima sa iyang taxi ug nakita niini sa iyang samin nga mikiaykiay nga naglakaw sa karsada ang bayot nga tulisan pahilayo sa maong lugar. Sa pagkakaron gisusi pa sa kapolisan ang maong hitabo sa katahap nga nagpabayot-bayot lang ang maong tulisan ug mao kini ilang gipanid-an karon. – (BANAT NEWS)