Sa pangilin sa Senyor San Jose kadalanan sa Mandaue gitak-opan

CEBU, Philippines - Gipangtak-opan ang mga dagkong dalan sa dakbayan sa Mandaue kagahapon sugod ala-una sa hapon nunot usab sa gipahigayon nga motorkada nga gipasiugdahan sa kagamhanan isip pormal nga pagsugod sa tinuig nga pangilin sa patron sa dakbayan nga si Senyor San Jose karong Mayo 8 niining tuiga.

Base sa gihatag nga kasayuran sa buhatan sa Traffic Enforcement Agency of Mandaue (TEAM) gisirhan ang mga dalan sa Sotero Cabahug, dalan A.C. Cortes Avenue, A. del Rosario, eskina dalan B. Ceniza , dalan Gomez ug eskina B. Ceniza, dalan Plaridel, Catalino Ouano ug eskina dalan Plaridel ug C. Ouano ug uban pa.

Subli lang kining maagian nianang pagka-alas 4 na sa hapon ug gihulagway sa executive director sa TEAM nga si Edwin Ermac nga wala kaayo’y reklamong ilang nadawat sa maong kalihukan.

Pipila sa mga alternatibong dalan nga giablihan alang sa mga sakyanan mao ang mga hilit nga dalan sa barangay Mantuyong ug barangay Guizo. Human sa motorkada alas 4 ang takna sa hapon maoy gisunod nga kalihokan maoy gihimo ang pagbukas sa trade exhibit nga gipahigayon sa atubangan sa City Hall ug gisugdan usab ang lainlaing kalingawan sama sa showdown sa mga banda ug uban pa.

Si Mayor Cortes, Bise Mayor Glenn Bercede ug mga sakop sa konseho nga gilangkoban nila ni Konsehal Lollipop Ouano Dizon, Konsehal Jimmy Lumapas, Konsehal Elestone Dabon ug mga kaubanan ang lakip usab sa misaksi sa maong kalihokan. (BANATNEWS)