Mga violations nga angay masayran

CEBU, Philippines - Kompleto sa accessories ang motorsiklo nga gipalit ni Robert (tinuod pangalan gipugngan) apan gituyo gyud niya nga panangtangan kini sa kagamitan o accessories sama sa side mirrors ug ang plate number diha niya gipapilit kilid sa motor.

Sa laktod, dili na makita ang plaka sa iyang motor kun ari ka magtan-aw sa likod. Ubos sa balaud wala kini itugot apan gibalewala ra kini niya hangtud nga miabot gyud ang higayon nga siya nadakpan.

Gawas nga kuwang sa accessories ang motorsiklo, nag ekis-ikis pa gyud siya nga mipadagan sa iyang sakyanan nga wala magsul-ob og helmet sa Gorordo Avenue dapit sa JY Square sa miaging semana.

Napugos ang deputized agent sa Land Transportation Office (LTO) sa pagdakop kaniya kay sa akto nasaksihan gyud sa law enforcer nga sa tanto nga pagpaekis-ikis niya sa motor, diriyot siya makabag-id og tawo.

“Sori kaayo Sir, maluoy ka ayaw lang ko og dakpa,” giingnan niya ang LTO deputized agent nga misakmit sa iyang lisensya.

Kay wala man gyud mahangyo ang law enforcer mihimo siya og lahi nga diskarte. “Pwede sir, Citation (Ticket) lang ang i-isyu nako, ayaw lang nang TOP?”

Kun TOP ang i-isyu ngadto sa drayber sakmiton gyud ang iyang lisensya dili sama kun Citation Ticket ang gamiton nga ang iya rang pangalan ug driver’s license numbers ang kuhaon aron i-rekord sa Traffic Violations Bureau sa CITOM.

Mas ganahan ang mga drayber kun Citation Ticket ra ang i-isyu kanila kay dili man nila tagdon pagbayad, lahi kun TOP nga mapugos sila sa paglukat sa ilang lisensya aron makapadayon sila pag-drive.

Kahilakon ang maong motorista dihang nahibaw-an niya didto sa LTO nga ang iyang multahan moabot og dul-an sa P4,000.

Wala siya magdahom nga moabot og dul-an sa P1,400 ang multa kun madakpan ang drayber nga nagmaneho og motorsiklo nga walay side mirrors, P1,778 sa wala pagsul-ob og crash helmet ug P578 sa pagbutang sa plate number kilid sa motor.

Sagad sa mga tag-iya og motorsiklo dili usab magtagad kun mapunder ang luyo nga suga sa ilang motor. Wala sila masayod nga kapin gihapon sa P1,000 ang ilang multa niini kun sila madakpan.

Si LTO-7 Regional Director Raul Aguilos miawhag sa mga motorista nga mosunod gyud sa lagda nga gilatid sa Republic Act 4136 kon Transportation and Traffic Code aron dili sila madakpan.

Ang LTO organic personnel uban sa mga sakop sa Task Force Alpha (TFA) kanunay’ng mopahigayon og checkpoint operations katulo sa usa ka semana sa lainlaing dapit sa Metro Cebu aron dakpon ang mga masalaypong drayber.

Kapin sa 100 ka drayber ang madakpan sa duha lang ka oras nga operation niadtong tungora ug nagpasabot kini nga daghan gyud diay nga motorista nga wala motuman sa lagda sa tukma nga pagmaneho og sakyanan.

Ang ubang motorista, ilabi na ang mga tag-iya og private vehicles, tuyoon gyud sa pagtaptap ang plate numbers sa ilang sakyanan maong pipila na kanila ang nadakpan. (/EIM) (BANATNEWS)