Office ni Odilao gilungkab

CEBU, Philippines - Mikapin sa P100 mil ang gibana-banang kantidad sa mga kabtangang nasakiyo sa wala hiilhing kawatan nga milungkab sa balay ni kanhi Cebu Customs Collector David “Boy” Odilao sa barangay Poblacion , dakbayan sa Talisay niadtong Huwebes sa buntag.

Ang record sa kapolisan sa dakbayan sa Talisay nagbutyag nga si Luna Villacorta, ang secretary ni Odilao maoy mitaho sa maong hitabo ngadto sa maong buhatan.

Gibutyag ni Villacorta nga siya maoy nangabli sa opisina ni Odilao niadtong Huwebes sa alas 11:30 sa buntag ug iyang nadiskobrehan nga nawala na ang Toshiba laptop nga balor og P100 mil ug digital camera nga nagkantidad og P7 mil.

Si Odilao kinsa dugay na nga miritero isip Cebu Customs Collector maoy amahan ni Talisay City Councilor Bernard Joseph Odilao kansang balay nahimutang pipila lamang ka metros   gikan sa buhatan sa kapolisan sa dakbayan.

Dihang gisusi nila ni PO3 Benedicto Lasque ug PO3 Euwen Pitogo sa theft and robbery section (TRS) ilang nasuta nga ang opisina sa biktima nga nahimutang sa nataran sa balay niini gilungkab sa wala hiilhing kawatan pinaagi sa pagguba sa window frame sa bintana sa opisina   hinungdan nga nakasulod kini sa maong opisina.

Ang kapolisan sa Talisay nangayo og Crime Scene Investigator sa provincial headquarters aron mokuha og dugang pang mga ebidensiya sa hitabo. (BANATNEWS)