19 anyos nga ulitawo naghikog

CEBU, Philippines - Gahi nang naabtan sa iyaan ang patay’ng lawas sa iyang pag-umangkon nga naghikog pinaagi sa paghigot og pisi sa liog sud sa ilang balay didto sa Sityo Kasadya, barangay Sta Cruz sa lungsod sa Ronda sa miaging gabii.

Ang nagpakamatay mao si Mark Anthony Gimena, 19 , ulitawo, ug wala nay ginikanan nga nagpuyo nalang sa iyang iyaan nga si Plonia Dalpatan, hingkod sa maong lugar.

Si PO2 Judie Rabutin sa Ronda Police Station mibutyag sa Banat News ang namatay mao ray nahibilin sa balay samtang ang iyang iyaan namaligya og isda sa merkado sa lungsod.

Apan pag-abot sa iyaan   sa ilang balay nakurat nalang kini dihang nakita niya nga nagbitay na ang iyang pag-umangkon nga   nagdiwalwal ang dila ug gahi na ang lawas kansang liog gibalikosan sa pisi ug ang pikas   tumoy gigaid sa   sagbayan sa ilang balay.

Subay sa gihimong pakisusi sa kapolisan nahibaw-an nga ang naghikog adunay kaliwat nga may deperensiya sa pangisip nga maoy gituohang hinungdan usab sa paghikog niini. (BANATNEWS)