Lalaki namusil, sugarol sa buwangan nagkatibulaag

CEBU, Philippines - Gipangita sa kapolisan ang usa ka lalaking giingong kalit namusil atol sa tigbakay sa manok sa sitio Pugon sa barangay Valladolid sa siyudad sa Carcar niadtong Biyernes sa alas 4:30 sa hapon.

Giila sa kapolisan ang suspek mao si Alsis Racoma, 43, residente sa Mangcao Village sa samang barangay.

Naatol sa kagubot ang pag-agi ni SPO1 Erving Avila nga nadestino sa Carcar City Police Station ug nagpuyo sa maong lugar kinsa daling miresponde apan napakyas pagsikop kang Racoma nga giingong iyaha rang ig-agaw.

Matud pa ni PO1 Junjie Lastimosa sa Carcar City Police Station unang nakalalis ni Racoma ang usa ka Bredon Apura diha sa buwangan tungod kay ang naulahi napildi sa manok ni Racoma ug mireklamong gitikasan kini.

“Gi-declare sa referee (kuyme) nga nidaog ang sunoy ni Racoma, nireklamo si Apura kay unfair kuno. Mao ‘tong nasuko si Racoma nagkalalis ug gi-try niya og pusil si Apura,” sumala pang Lastimosa. Sumala pa kaupat ka higayon nga mipabuto si Racoma sa kalibre .45 pistola ug swerteng walay naigo apan nagkatibulaag og panagan ang mga tawo.

Matud pang Lastimosa mao say paglabay ni Avila luwan sa iyang awto dihang nagkatibulaag ang mga tawo maong mikanaog kini ug miresponde ug nasigpatan niini si Racoma nga nagdagan nga nagbitbit og armas.

Giingong gisitar kini ni Avila apan wala kini mopatuo ug misakay sa usa ka Nissan Vannette van ug mipasutoy niini apan gipusil ni Avila ang ligid sa tuo maong wala kini makadagan og layo. Tungod niini mikanaog ug midagan palayo si Racoma ug wala na maabti pa ni Avila kinsa midiretso sa ilang presinto ug nangayo og backup.

 Nakuha diha sa crime scene ang upat ka kabhang sa bala sa kalibre .45 ingon man ang van nga gibiyaan ni Racoma nga may plakang GTX-277. (BANATNEWS)