70 pamilya sa Brgy. Luz demolison

CEBU, Philippines - Human sa tensyon ug kabalakang gibati sa mga residente sa sitio San Miguel sa barangay Apas susama usab karon ang gibati sa gibanabanang 70 ka pamilya sa tulo ka mga sitio sa barangay Luz ning dakbayan sa Sugbo tungod sa gikatakdang demolisyon sa ilang mga panimalay karong Mayo 15.

Ang maong mga pamilya nagpuyo sa sitio Langka, sitio Mabuhay ug sitio Lubi sa maong barangay.

Ang pangulo sa Nasudnong Katawhang Kabos (Nakabos) nga si Evangeline Abejo mipadayag nga mitabang siya sa maapektohan nga mga pamilya ug gipadad-an na niya og suwat ang buhatan sa Division for the Welfare of the Urban Poor (DWUP) bahin niini.

Giingong mipasalig ang DWUP kaniya nga buhaton gyud ang tanan niini nga mahimo aron matabangan ang mga apektadong pamilya. Ang mga apektadong molupyo mihangyo sa siyudad nga ipapalit ang luna nga ilang gipuy-an ug sa siyudad nalang sila mobayad.

Matud pa ni Abejo nga ang maong mga luna gipanag-iya sa nasudnong kagamhanan ubos sa Community Mortage Program apan nasuta nga daghan kanila ang nadelatar sa pagbayad maong gimandoan na sila sa pagpahawa. Giklaro ni Abejo nga ang luna gipanag-iya sa gobiyerno busa ilang hingusgan nga dili mapapahawa sa ilang gipuy-an ang 70 ka pamilya.

“Gawas nga among hingusgan ang pagpabilin sa ilang gipuy-an usa sa among option ‘ron ang paghangyo sa gobiyerno nga paliton ang bakante nga mga luna sa maong dapit ug ang city government maoy mobayad niini. Silbi adto na lang pud mobayad ang mga tawo ngadto sa city government,” sumala pa ni Abejo.

Matud pa niya nga dunay ubang mga lumulopyo ang nabalaka pag-ayo nga mawad-an na sila og panimalay nga diin pipila kanila kapin na sa 50 ka tuig namuyo sa maong dapit. (BANATNEWS)