Pinulongan Bisaya sa sesyon aprubado

CEBU, Philippines - Hingpit na nga gi-aprobahan sa board sa hunta probinsyal ang gisugyot nga resolusyon ni Bokal Julian Daan nga ang katapusang semana sa buwan sa Pebrero himuong “Semana sa Pinulongang Sugbuanong-Binisaya.”

Si Daan miingon nga ang katuyoan sa maong resolusyon mao ang pagtisok og halapad nga pagpakabana sa kulturang Sugbuanon. Tuyo ni Daan nga atol sa kada sesyon sa hunta probinsyal ug sa kabarangayan sa lalawigan sa Sugbo gikinahanglan nga ang pinulongang Sugbuanon ang gamiton sa mga opisyales.

Tinguha ni Daan nga magpabilin ang kulturang Pilipino nga nagsunod sa orihinal nga lengwahi niini nga mao ang Binisaya. Matud pa sa maong resolusyon nga tungod sa kaayuhan sa kulturang Sugboanon dako ang panginahanglan nga tipigan gyud ug ipatunhay ug palambuon ang kultura pinaagi sa pag-edukar bahin niini sa mga Sugboanon.    - BANAT NEWS