Leadership training sa DOLE malampuson

CEBU, Philippines - Nagmalampuson ang usa ka Leadership Training Workshop sa Department of Labor and Employment (DOLE-7) nga gipasiugdahan   ni Gobernador Gwendolyn Garcia sa probinsya sa Sugbo alang sa mga valedictorian nga nagpuyo sa probinsya sa Sugbo.

Kini gipahigayon didto sa DECS Eco-Tech Center sa Lahug syudad sa Sugbo sa tinguha nga mahimo silang epektibong lider sa ilang tagsa-tagsa ka komunidad.

Si DOLE-7 Regional Director Maria Gloria Tango nagpasalamat tungod kay iyang nakombinse ang gobernador   nga ikapatuman ang gitawag nga   experiential approach o sa pagtuon pinaagi sa buhat (learning by doing).

Dugang pa niya nga ang maong aktibidad mahimong hagit sa mga bata tungod kay limitado lamang ang mga lektura ug diskusyon sa pagmugna og personal nga konsepto sa leadership ug human niana mao na ang intense adventure type of challenge maoy ipabuhat kanila.

Si Tango miingon nga ang ilang facilitator sa maong training naglangkob nila ni Danilo Descartin nga maoy Working Youth Center Volunteer Facilitator kinsa samang higayon maoy (ASPAC Bank-Danao Branch Manager) ug ni Barangay Councilor Mario Marababol sa Barangay Bakilid, syudad sa Mandaue.

Sila pulos mga inilang outstanding youth leader sa Cebu City Government (2007) ug United Nations Association of the Philippines (2000).   

Human sa tulo ka adlaw nga pagbansay-bansay, ang 189 ka mga partisipante nakahuman gayud sa tibook kurso niini.  - BANAT NEWS