San Remegio ideklarar nga Archeological Heritage Park

CEBU, Philippines - Gitinguha karon sa Cebu Provincial Tourism Heritage Council (CPTHC) nga ikadeklarar nga Archeological Heritage Park ang lungsod sa San Remegio.

Matud pa ni Professor Jojo Bersales, chairman sa CPTHC committee on sites, relics and structure nga kini naggumikan sa kaabunda sa mga karaang butang sa karaang tawo nga nakawtan sa mga lokal ug langyaw nga mga archeologists didto sa lapyahan sa baybayon sa Barangay Poblacion, sa maong lungsod.

Ang maong mga butang nga nakawtan sa maong dapit nagpangidaron na og kapin sa usa ka libo ka tuig, busa angayan lang nga himuong Archeological Heritage park ang maong lungsod.

 Matud pa ni Bersales, nga nakadesisyon sila sa paghimo sa maong lakang tungod kay gawas nilang mga Sugboanong mga archaeologist, ang mga bisitang langyaw nga archaeologist nakadiskobre usab og lubnganan uban ang mga antik na nga mga butang.

Sigun pa ni Bersales nga iya nang nasultihan si Governor Gwendolyn Garcia sa maong lakang ug ang gobernador mipasalig sa iyang dakong suporta alang sa kalampusan niini.

Hinuon gipahibawo ni Bersales nga ila pang iduso ngadto sa hawanan sa hunta probinsiyal sa Sugbo ang ilang tinguha nga himuon nang labing unang Archeological Heritage Park sa Pilipinas ang lapyahan sa Public Beach Resort sa Barangay Poblacion ,San Remegio. Dugang pa niya nga gumikan sa ka-adunahan niini sa mga karaang butang ug kamabulokong kasaysayan nga makita sa maong lugar, angay lang kining panalipdan ug protektahan.

Nasayran nga ang   ubay-ubay na nga nakubkoban nga mga karaang butang sa karaang   lubnganan sa maong lungsod sa pagkakaron gipreserbar sa museum sa   maong lungsod mismo.    - BANAT NEWS