Mga armas nga wala ma-renew ang lisensya kompiskahon
CEBU, Philippines - Hugtan na sa Police Regional Office-7 ang pagsubay sa mga lisensyadong armas nga wala na ma-renew og balik sa mga tag-iya agi subay sa kampanya sa National Firearms Control Program (NFCP) sa gobiyerno.
Gipasangil sa kapolisan ang pagsaka sa mga krimen nga diin ang mga kriminal migamit og mga loose firearms dinhi sa nasud.
Matud pa ni Sr. Supt. Orlando Ualat, ang hepe sa Regional Directorial Staff of PRO-7 sa gipahigayong Talakayan sa Isyung Pulis’ (TSIP) nga gimandoan ang ginsakupan niini nga pahugtan ang maong kampanya.
Base sa talaan, adunay 67,990 ka mga rehistradong armas dinhi sa Central Visayas nga mas taas og unom ka porsiyento kun itandi sa nakalabay’ng tuig nga 64,128.
Apan naalarma ang kapolisan tungod kay sa maong rehistradong mga armas sa 2011 duna nay 27,819 ka buok nga wala ma-renew. Niadtong Abril 2011 duna ray 7,870 ka mga nag-expire nga lisensyadong armas ang wala ma-renew o 253 porsiyentong pagsaka.
Ubos sa Oplan Kontra Boga, si Ualat miingon nga kinahanglang bisitahon sa mga lokal nga kapolisan ang mga panimalay sa mga nanag-iya og mga armas nga wala na ma-renew aron kompiskahon kini.
Miangkon hinuon siyang hinay gyud ang proseso sa pagkuha og lisensya apan obligasyon sa naghupot niini nga mapa-lisensyahan kini. (BANATNEWS)
- Latest
- Trending
