Lalis sa trapiko enforcer gidunggab

CEBU, Philippines - Nasikop sa kapolisan ang midunggab ug miangol sa usa ka traffic enforcer sa dakbayan sa Lapulapu tungod sa panaglalis sa lagda sa trapiko diha sa barangay Poblacion sa dakbayan sa Lapulapu sa milabay’ng hapon.

Ang nasikop pipila ka oras human makadunggab mao si Ryan Legarbes, nagpuyo sa barangay Gun-ob dakbayan sa Lapulapu samtang ang biktima mao si Temistocles Boholst, 69, sakop sa City Traffic Management System sa Lapulapu.

Matud pa ni PO2 Winston Ybañez dunay mga saksing mitumbok kang Legarbes nga maoy midunggab sa biktima hinungdan sa pagsikop nila niini.

Ang suspek positibong gitumbok sa biktima nga maoy midunggab kaniya niadtong milabay’ng Miyerkules sa hapon dihang iyaha kining gisitar tungod sa pagpasagad og parking sa iyang traysikol.

Matud pa nagkalalis ang duha ug giingong mibahad ang suspek nga balikan ang biktima ug dangtan pila ka gutlo mibalik kini ug gidiretso og dunggab si Boholst. (BANATNEWS)