Milayat sa bridge gipabuhian

CEBU, Philippines - Gipabuhian sa piskaliya ang lalaking milayat sa taytayan nga gituohang buot untang maghikog apan mitugpa ngadto sa tawo nga naatol nga namana ilawom sa Mandaue-Mactan Bridge kapin usa ka semana na ang nakalabay ug maoy namatay.

Base sa resolusyon nga giluwatan ni Lapulapu City Prosecutor Evangelyn Gecale, wala kini makakita og igong basehanan nga pasakaan og kaso si Aniano Berdin gumikan kay wala kini sa hustong pangisip.

Gumikan sa desisyon sa piskalya nasagmuyo ang pamilya sa namatay nga si Danilo Sison kinsa niadtong tungora igo rang nanginabuhi pinaagi sa pagpamana og isda. Si Sison nakaangkon og mga bali sa kalawasan nga nakaingon sa iyang kamatayon.

Si Berdin gipasakaan og kasong homicide sa Lapulapu City Police Office bisan paman sa pahibalo sa banay’ng Berdin nga duna kini deperensya sa pangisip.

Apan human sa pagsusi sa piskalya ug sa mga testimonya ug ebidensya wala makakita og basehan ang piskal aron isipong sad-an si Berdin tungod sa kahimtang sa pangisip niini. (/EIM) (BANATNEWS)