M. Fernan Bridge Ayuhon

CEBU, Philippines - Ipatuman na sa Department of Public Works and Highways (DPWH) ang 150 diyas nga pag-ayo sa Marcelo Fernan Bridge sugod karong Mayo 2 ug ang kahuot sa trapiko sa maong lugar gipaabot nga mahitabo.

Si Engr. Santiago Suico, Jr. district engineer sa DPWH Cebu Sixth Engineering District Office mibutyag kagahapon sa pamantalaang The Freeman, igsuong pamantalaan sa Banat News nga dili hingpit nga sirad-an ang maong taytayan.

Apan bisan pa niini nalantawan nila ang kahuot unya sa trapiko sa maong dapit.

Si Frank Basil, hepe sa City Traffic Management System sa dakbayan sa Lapulapu nagkanayon nga pangandaman nila ang maong problema.

Sa samang higayong si major Edwin Ermac, hepe sa Traffic Enforcement and Management sa dakbayan sa Mandaue nagkanayon nga nalantawan nila nga ang mabug-atan sa trapiko mao ra ang dalan Plaridel sa maong dakbayan.

Samtang sa bahin ni Mayor Paz Radaza sa dakbayan sa Lapulapu nasagmuyo tungod kay wala siya pahibaw-a sa taga DPWH kalabot niining maong isyu.

Busa gibutyag sa mayor nga iyang ipatawag ang mga kadagkoan sa trapiko sa iyang dakbayan aron kasabotan nila ang angay buhaton aron masulbad ang kahuot unya sa dagan sa trapiko sa panahon nga trabahuon ang maong tulay.

Ang lakang sa DPWH himoon aron ayuhon ang depekto sa maong tulay nga nadeskobrehan sa Bridge Management Board nga maoy mi-inspection niini.

Nasuta nila nga delikado kaayo sa mga sakyanan ang expansion joint nga bahin niini alang sa tanang matang sa sakyanan. - BANAT NEWS