CEBU, Philippines - Gipaabot nga hugopan sa mga relihiyosong Katoliko nga Oponganon ang simbahan sa Birhen sa Regla karong Sabado ang adlaw sa pagduaw sa imahen ni Senyor Santo Niño nga mao usab ang kasaulogan sa Kadaugan sa Mactan.
Ang pagduaw sa imahen ni Senyor Santo Niño maoy bahin sa kalihokan sa ika-447 ka tuig nga kasumaran nga pagkaplag sa maong imahen sa usa ka payag nga maoy gitarokan niining simbahan sa Birhen sa Regla niadtong Abril 28, 1565.
Si Father Tito Suquino nga maoy executive chairman sa Santo Niño de Cebu Agustinian Social Development Foundation miingon nga nalakip sa mga kalihokan sa maong adlaw mao ang pagpahigayon sa Kaplag Festival.
Dugang pa niya nga ipahigayon usab ang misa sa alas 2:00 ang takna sa buntag ug sundan kini sa recognition nga pagahimoon sa Naval Forces ni Senyor Santo Niño isip most esteemed captain general sa Spanish forces dinhi sa Pilipinas.
Human sa maong kalihokan isunod ang pagdala na sa imahen ni Senyor Santo Niño ngadto sa Malakanyang sa Sugbo aron mobiyahe ngadto sa dakbayan sa Lapulapu nga motadlas sa Mactan Channel.
Matud pa ni Father Suquino nga ang mga bangka nga mokuyog sa paglawig sa imahen mokayab og mga bandila isip pagpasidungog niini nga uban sa pagpalanog sa siren ug gun salute. Si Father Jimmy Duero sa Birhen sa Regla sa dakbayan sa Lapulapu midugang nga sa alas 8:30 ang takna sa buntag sa maong adlaw ipahigayon ang Marian Mass ug sa alas 12:15 ang takna sa udto mobalik na usab ang imahen sa dakbayan sa Sugbo.
Kahinumdoman nga ang maong adlaw sa kalihokan maoy paghandom sa adlaw nga napalgan ang imahen ni Senyor Santo Niño ni Juan Camus kinsa usa sa mga sundalo nga sakop ni Miguel Lopez de Legaspi. - BANAT NEWS