Sesyon sa City Hall makita 'live'

CEBU, Philippines - Mabati ug makita na ang live streaming session sa City hall matag Miyerkules sa buntag ang labing una sa tibuok nasud.

Kini makita pinaagi sa website nga www.cebu city.gov.ph nga magbutyag sa mga proyekto, plano ug isyu sa gobiyerno nga angay masayran sa   katawhan.

Sumala pa ni City Councilor Roberto Cabarrubias sa pakighinabi sa Banat News nga ang tumong sa maong live streaming mao ang pagpabati sa matag molupyo sa Sugbo sa tanang kaayohang nahimo sa kagamhanan ning dakbayan.

Midugang si Cabarrubias nga ang mga katawhan mismo ang unang makatimbang-timbang kun si kinsa sa mga politiko o mga tawong taga City Hall ang nagtug-an sa tinuod.

Apan sumala pa ni Mayor Michael Rama nga kinahanglan usab nga sa panahon sa session ang estoryahan sa mga konsehal ug sa mga motambong niini mga mapuslanong butang kay makita ra ba kini sa kadaghanan.

Dugang pa ni Rama nga ang mga konsehal nga motambong sa session kinahanglang magpakita nga sila kasaligan ug angay respetohan isip buotan nga mga public servant.

Hinuon si Cabarrubias miingon nga ang maong live streaming session mag-agad gihapon sa media og unsaon nila pagsabwag sa kasayoran ngadto sa mga katawhan. - BANAT NEWS