Kulatadong tawo gitambog sa dagat patay

CEBU, Philippines - Naputos sa bun-og nga patay’ng lawas sa usa ka lalaki ang napalgang naglutaw diha sa Pier 3, sa barangay Tinago, dakbayan sa Sugbo niadtong Lunes sa hapon.

Ang maong lalaki nga padayon pang giila sa kapolisan nakit-an sa mga crew sa nagdunggo nga barko kinsa mitawag dayon sa Philippine Coast Guard.

Ang sakop sa PCG Special Operation Group pinangulohan ni Felix Barajan sa report sa Homicide Section sa Cebu City Police Office mihulagway sa patay’ng lawas nga kasarangan ang panglawas ug may tattoo sa walang bukton nga triple x.

Usa ka pitaka nga may usa ka Qatari bill (kwarta sa Qatar) ug duha ka calling cards ug mga ID-size pictures sa biktima apan walay pangalan niini.

Gituohan nga ang biktima gikulata sa wala pa kini patya ug gilabay sa dagat diin gitiwasan usab kini og kaon sa mga isda ilabi na sa iyang kalawasan. Duna say nakit-ang timailhang gibunalan kini diha sa liog.

Ang patay’ng lawas gidala sa Saint Francis Funeral Homes aron iawtopsiya ug posibleng pag-ila kaniya sa mga kabanay. (BANAT NEWS)