CEBU, Philippines - Gikwestyon sa kampo sa suspek sa pagdagit ug pagpatay sa 6-anyos nga batang si Ellah Joy Pique nga si Bella Ruby Santos ang resulta sa awtopsiya nga gihimo sa medico legal nga si Dr. Nestor Satur sa Philippine National Police Regional Crime Laboratory.
Sa pagpadayon sa hearing sa maong kaso kagahapong adlawa diha sa sala ni Regional Trial Court Branch 10 Judge Ester Veloso giinsister sa depensa nga dunay giusab sa resulta sa awtopsiya sa patay’ng lawas ni Pique.
Matud pa sa abogado ni Santos nga si Julius Cesar Entice nga giilisan sa medico legal ang secondary placidity ngadto sa primary placidity nga walay pagtugot sa korte ug mahimong makasuhan si Satur og tampering of evidence tungod niini. Ang placidity mao ang reaksyon sa patay’ng lawas pipila ka oras gikan sa pagkamatay.
Apan si Satur sa iyang bahin, mihimakak sa maong pasangil ug iyang giklaro nga usa lang kadto ka clerical error. “That was clerical error and was not intended to change the result of the autopsy.”
Sa laing bahin ang amahan sa biktima nga si Renante Pique misaysay sa mga tigbalita nga aduna silay nadawat nga report nga si Charles Ian Griffiths ang hinigugma ni Santos wala na sa United Kingdom (UK) ug nagpunay na kini og balhin-balhin og lugar.
Samtang si Department of Justice Secretary Leila De Lima mibutyag usab nga angayan gyud nga makombikto si Santos ug Griffiths tungod sa maong krimen nga gihulagway niya may pagkasusama sa human trafficking.
Buwan sa Pebrero 9 sa miaging tuig napalgan ang patay’ng lawas sa 6-anyos nga si Ellah Joy sa bung-aw diha sa lungsod sa Barili usa ka adlaw human kini dagita sa Minglanilla, dunay mga testigong mitumbok nila ni Santos ug Griffiths nga maoy misignit sa bata butang nga gihimakak sa duha. (BANATNEWS)