Nadasmagan sa polis patay
CEBU, Philippines- Patay ang usa ka babayeng criminology student sa usa ka unibersidad sa Sugbu human kini mabanggai sa usa ka polis sa miaging gabii diha sa sitio Borbajo sa barangay Talamban ning dakbayan.
Ang biktima nailhan nga si Sheobe Salazar Dela Sala, 23, usa ka Criminology Student sa University of Cebu ug molupyo sa nahisgutang lugar samtang natanggong karon sa karsel ang polis nga si SPO1 Marcelo Querubin, nadestino sa Police Regional Office (PRO-7).
Sa pakighinabi sa Banat News ni SPO4 Ramon Budiongan, imbestigador sa City Traffic Division misaysay kini nga ang biktima nagbarog daplin sa karsada dihang nabanggaan sa multicab ni Querubin.
Matod pa ni Budiongan nga base sa alegasyon ni Querubin nga kalit lang milabang ang biktima ug uwahi na siyang nakabantay maong naigo gyud kini sa iyang sakyanan.Ang igsuon sa biktima nga si Roderick matud pang Budiongan gisugo niini ang biktima pagpalit og sud-an ug nagbarog kini daplin sa karsada samtang nagpaabot og sakyanan dihang nabanggaan kini sa polis.
Dihang gi-liquor test si Querubin negatibo kini matud pang Budiongan.
Samtang kagahapon sa kaadlawon giingong mireklamo ang suspetsado sa iyang panglawas hinungdan nga gidali kini og dala sa Chong Hua Hospital ug kasamtangan kini nga na-confine.
Matud ni Budiongan nga atol sa hitabo natumba ang multicab nga miresulta sa dakong pangos sa bukton sa maong polis.
Kasong reckless imprudence resulting to homicide ang atubangon sa maong polis. (/EIM) (BANATNEWS)
- Latest
- Trending
