Ginang nalumos sa swimming pool

CEBU, Philippines -  Nalumos ang usa ka ginang kinsa kauban sa tibuok pamilya nga naglingaw -lingaw sa pagpangaligo sa swimming pool sa barangay Macaas sa lungsod sa Catmon niadtong Domingo sa alas 7:00 sa gabii.

Ang biktima mao si Ruby An Bumaya, 24, minyo, nga taga barangay Liki, lungsod sa Sogod.

Si SPO2 Rex Menchavez, desk officer sa Catmon Police Station mibutyag sa Banat News ang biktima kauban sa iyang bana ug mga anak apan miadto kini sa lawom nga bahin sa swimming pool nga wala hibantayi sa iyang mga kauban ug didto kini malumos.

Apan tungod kay daghang nangaligo sa maong swimming pool dugay nga nadiskobrehan ang pagkalumos sa biktima kinsa miunlod na sa hawanan sa maong kaligoanan.

Gisuwayan kini og dala ngadto sa Juan Dosado Memorial Hospital ni Jason Bumaya, bana sa biktima apan gideklarar kini sa mga doctor nga dead on arrival (DOA).

Ang kapulisan mirekomendar sa kabanay niini nga ipaubos sa autopsy ang patay’ng lawas niini aron matino kun pagkalumos ba gyud ang gikamatyan niini . (BANATNEWS)