CEBU, Philippines - Gitigom kagahapon ni Mayor Michael Rama ang 168 ka pamilya nga papahawaonon gikan sa usa ka pribadong yuta sa Sitio San Miguel, Brgy. Apas sa dakbayan sa Sugbo ug iyang gisaaran nga tabangan ang maong mga pamilya.
Ang maong mga molupyo dugay nang gipasidan-an sa tag-iya sa luna nga ilang gipuy-an nga papahawaon apan wala kini maminaw sa maong pasidaan.
Dihang miabot na ang gitagal nga petsa sa tag-iya sa yuta nga si Mariano Godinez, ug mitugot na ang korte sa pagdemolis kanila, mihana sila og sukol busa milihok si Rama isip mayor sa dakbayan sa paghangyo sa tag-iya nga lugwayan una ang higayon sa pagpabilin nila sa maong luna.
Gani mihangyo ang maong mga molupyo og dugang 45 ka adlaw nga lugway aron sila makapangita og lugar nga ilang kabalhinan.
Sa iyang pakighinabi sa mga molupyo si Rama mipasalig nga palihukon niya ang tibuok pwersa sa mga abogado sa City hall aron sulbaron ang maong kaso.
Si Konsehal Edgardo Labella misaysay usab nga pormal na sila nga miduso og motion for reconsideration sa Court of Appeals kagahapon aron mapugngan ang hulga nga demolisyon sa maong dapit. (/WC) (BANATNEWS)