Tulisang may granadang plastik wa hidakpi

CEBU, Philippines - Wala pa madakpi sa kapolisan ang tulisang migamit og plastic nga granada nga nakatulis og P15 mil sa usa ka kan-anan sa barangay Lipata, lungsod sa Minglanilla sa miaging adlaw.

Si PO1 Noel Namale sa Minglanilla Police Station nagduda nga taga Minglanilla ra ang maong tulisan kay yano man kaayong giilad niini ang biktima pinaagi sa plastic nga granada. 

Ang bikma sa maong tulis mao si Mark Anthony Basillo, 59, ang tag-iya sa Ant Lilly Eatery sa Lipata.

Mahinumdoman nga si Basillo, naglabay sa iyang basura dili layo sa iyang kan-anan sa maong higayon.

Apan nakurat siya kay pagbalik niya sa iyang tindahan may tawong wala hiilhi nga mipupho sa iyang kuwarta gikan sa iyang drawer.

Busa iya kining giduol apan kalit nga mihiwasa ang tawo uban sa paglanit sa granada gikan sa iyang bulsa ug mihulga nga iya kining ihapak sa dagway ni Basillo.

Sa kakuyaw sa biktima miatras ug migawas sa iyang tindahan sa kahadlok nga mapulbos siya sa granada sa tulisan.

Taud-taod migawas ang tulisan sa kan-anan nga kalma kaayo ug giitsa sa hawanan niini ang granada.

Si Basillo kinsa hinan-aw og sine, nagkamang-kamang ug gi-ukoy ang granada samtang gipaabot kini nga moulbo.

Dihang gilamok siya og pinaabot sa kadugay miulbo sa maong   bomba, mihinayhinay kini og kamang paduol sa granada, apan kalit kining   mihiwasa   sa kalagot dihang nasuta niya nga plastic nga duwaan diay sa bata ang maong granada.

Ang kapolisan nagkatawa nga naglagot ug maoy ilang gipanid-an karon ang maong tulisan kay gituohan nila nga mogamit gihapon kini sa maong taktika sa iyang sunod nga pagpanulis. - (BANAT NEWS)