Tubag ni PNoy sa suwat sa BOC gipaabot

CEBU, Philippines - Tua na sa buhatan ni Presidente Benigno “Noynoy” Aquino III ang suwat hangyo ni Bureau of Customs(BOC) Commissioner Ruffy Biazon sa pagbawi sa daang edipisyo sa BOC Cebu nga gihimong Malacañang sa Sugbu (MS).

Matud pa ni Biazon   nga nagpaabot nalang sila sa tubag sa Malacañang sa maong suwat aron kun mosugot ang Pamuno nasud magamit na sa BOC Cebu ang maong edipisyo.

Ang kasamtangang buhatan sa Cebu Customs nga nahimutang sa Cebu International Port (CIP) angay nang   biyaan    kay gubaon na ug delikado kaayo sa publiko. 

Giabangan kini sa BOC og tag-P50 mil matag buwan, busa kun mabawi nila ang     MS makadaginot sila sa gasto.

 Apan samtang dili pa mabawi ang MS, nagplano si Cebu Customs District Collector Ronnie Silvestre nga moabang og laing edipisyo nga duol sa pantalan.

Si Mayor Michael Rama mipadayag nga dili na ibalik   ang MS ngadto sa BOC   kay ilang gipreserbar ang historical heritage sa maong edipisyo ug giplanohan kining himoong museum.

Apan si Biazon mipadayag nga walay angayang ikaproblema ang mga opisyal sa dakbayan sa Sugbo kay ila gihapon kining ipreserbar tungod sa iyang historical heritage, ug wala sila’y usbon kun ugaling mabawi nila ang maong edipisyo nga natukod niadtong tuig 1810.

Ang maong edipisyo gihimong MS niadtong panahon ni kanhi presidente sa nasud nga si Kongresista Gloria Arroyo sa Pampanga. - (BANAT NEWS)