CEBU, Philippines - Gawas sa kaso sa mga tinun-an sa high school sa Saint Theresa’s College nga wala papasoha atol sa ilang gradwasyon, susamang kaso usab ang nasugatan sa duha ka mga estudyante sa College of Nursing sa South Western University (SWU) kinsa wala usab makapaso tungod kay giingong nahagbong og pipila ka subject.
Busa kasong sibil ang gisang-at sa mga ginikanan niini ngadto sa korte batok sa administrador sa maong eskuylahan.
Ang kihante mao ang mga magtiayong Joselito ug Daisy Leonardo ug Benedicto ug Crisanta Delos Santos, mga ginikanan sa mga estudyante nilang mga anak nga sila si Jervis Leonardo ug Raymart Delos Santos pulos nursing student sa SWU.
Samtang ang mga respondente mao sila si Elsa Suralta, ang presidente sa SWU, Lucris Tan ang Dean sa College of Nursing; Juliet Cristi Salares, ang Clinical Instructor sa duha ka tinun-an ug Niel Bryan Villaraso, chairman sa Level 2.
Sila nag-atubang og kasong Mandamus and/or Specific Performance and Damages with prayer for writ of preliminary injunction and temporary restraining order (TRO).
Mikiha ang maong mga ginikanan tungod kay ang ilang duha ka anak gitakda man unta nga mopaso niadtong Marso 30, 2012 sa degree nga Bachelor of Science in Nursing.
Apan sa wala pa ang maong adlaw giingong kauban sa listahan ang duha ka tinun-an sa mga mograduwar ug gani mibayad pa sila og P6,215 sa pinning uniform.
Niadtong Marso 21, siyam ka adlaw sa wala pa ang graduation rites giingong ang duha ka tinun-an gipatawag sa ilang clinical instructor nga si Salares ug gipahibalo nga dili sila makapaso tungod kay aduna sila’y hagbong nga subject.
Tungod niini, ang duha ka tinun-an nakurat ug wala makatuo sa gipahibalo kanila hinungdan nga ilang gipangayoan og summary si Salares sa ilang grado diin didto nasuta nila nga wala sila mahagbong hinungdan nga naglibog sila nganung dili sila makapaso.
Human nila isumbong sa ilang mga ginikanan, giklaro dayon sa naulahi kun unsay nahagbongan sa ilang mga anak apan nasuta nila nga wala kini hagbong nga mga subject.
Tungod niini, ang magtiayong Leonardo nangayo og resulta sa pre-board examination ug class standing ni Jervis apan si Salares giingong nagdumili sa paghatag niini.
Tungod niini ang maong mga tinun-an mihangyo sa korte nga unta ipadayon ang pagpatuman sa Temporary Restraining Order (TRO) ug ang Writ of Preliminary Mandatory Injunction hangtud sa pagsugod na sa bista.
Gusto usab silang magpabayad og P 300 mil nga moral damages, P100 mil nga exemplary damages, P50 mil nga attorneys fee ug laing P50 mil alang sa litigation fee.
Samtang sa habig sa SWU pinaagi ni Assistant Dean nga si Anthony Mercado kini nagkanayon nga kasamtangan pa nilang giandam ang ilang tubag sa maong pasangil. - (BANAT NEWS)