CEBU, Philippines - Maayong pagkabuak sa ulo sa usa ka technician sa Tsuneishi Heavy Industries sa Balamban human nabangga ang iyang motorsiklo ngadto sa punoan sa nangka pasado alas-2 sa kaadlawon kagahapon sa national highway barangay Arpili sa lungsod sa Balamban.
Ang biktima giilang si Reynaldo Doronila, 24, molupyo sa Cadiz City Negros Occidental ug kasamtangan nga nagpuyo sa sulod sa maong kompanya.
Sa pakighinabi sa Banat News ni PO1 Rodney Cambarijan sa Balamban Police Station kini mitugan nga padulong sa Toledo ang biktima luwan sa iyang motorsiklo apan pag-abot sa maong lugar mipilit kini sa dakong punoan sa nangka, tungod sa kakusog sa pagbangga natumba ang maong kahoy.
Matud pa ni Cambarijan posibleng kusog kaayo ang dagan sa motorsiklo sa biktima base kini sa hitsura sa motorsiklo niini ug sa natumbang kahoy hinungdan nga nagrabehan kini ug namatay. - (BANAT NEWS)